महिला या शक्तीचे प्रतीक आहेत. त्यांच्या क्षमतेवर कोणीही शंका घेऊ शकत नाही. परंतु आयुष्याच्या प्रवासात आपल्याला कधी ना कधी मदतीची गरज पडत असते. अशावेळी सरकारकडून चालवण्यात येणाऱ्या विविध योजना खूप उपयुक्त ठरू शकतात. जन्मापासून ते वृध्दावस्थेपर्यंत या योजना महिलांना प्रत्येक टप्प्यावर साथ देत असतात. एखाद्या छोट्याशा जीवाला आई म्हणून या जगात आणण्यापासून ते बचत करून मुलीचे भविष्य सुरक्षित करण्यासाठी सरकारच्या कल्याणकारी योजना आपल्यासाठी खूप महत्त्वाच्या ठरत असतात. आज आपण सदर लेखातून अशा 6 महत्त्वपूर्ण योजनांची माहिती देत आहोत, ज्या तुमच्यासाठी अत्यंत फायदेशीर ठरणार आहेत.
1. प्रधानमंत्री मातृ वंदना योजना-
ही योजना देशातील गर्भवती महिलांच्या आरोग्याची काळजी घेण्यासाठी 2017 मध्ये सुरू करण्यात आलेली आहे. या योजनेच्या माध्यमातून गर्भवती महिलांना 5 हजार रुपये देण्यात येतात. जे दोन हप्त्यांमध्ये दिले जातात. ही आर्थिक मदत गर्भधारणेदरम्यान व बाळंतपणानंतरच्या पोषणासाठी देण्यात येते.
2. सुकन्या समृद्धी योजना-
ही योजना 2015 मध्ये मुलींच्या चांगल्या भविष्यासाठी सुरू करण्यात आलेली आहे. या योजनेमध्ये तुम्ही तुमच्या मुलींच्या नावाने खाते उघडून त्यांच्या शिक्षणासाठी किंवा लग्नासाठी पैसे साठवू शकता. या योजनेमध्ये तुम्हाला कमीत कमी दरमहा 250 रुपये जमा करता येतात व सरकार त्यावरती चांगले व्याजदर देखील देते. उदाहरणार्थ जर तुम्ही 1000 रुपये भरले तर तुमच्या मुलीच्या खात्यामध्ये 21 वर्षानंतर 5,54,612 रुपये जमा होतील.
3. पीएम उज्ज्वला योजना-
अनेक घरांमध्ये स्वयंपाकासाठी स्वच्छ गॅस मिळत नव्हता त्याचबरोबर चुलीच्या धुरामुळे महिलांना त्रास होत होता. ही समस्या दूर करण्यासाठी ही योजना राबवली जात आहे. या योजनेमुळे 10 कोटी पेक्षा जास्त महिलांना मोफत गॅस कनेक्शन देण्यात आलेले आहेत. तसेच त्यांना गॅस सिलेंडर पुन्हा भरण्यासाठीही सवलतीच्या दरात जवळपास 550 रुपये देण्यात येतात.
4. प्रधानमंत्री मुद्रा योजना-
ही योजना महिलांना आत्मनिर्भर बनवण्यासाठी व स्वतःचा व्यवसाय सुरू करण्यासाठी अत्यंत फायदेशीर ठरते. ही योजना 2015 मध्ये सुरू करण्यात आलेली आहे. या योजनेच्या 68 टक्क्यांहून अधिक लाभार्थी महिलाच आहेत. या योजनेच्या माध्यमातून 50,000 रुपयांपासून ते 20 लाख रुपयांपर्यंत कर्ज दिले जाते. विशेष म्हणजे महिलांना व्याजात वेगळी सवलत देखील दिली जाते.
5. पीएम आवास योजना-ग्रामीण-
या योजनेच्या माध्यमातून देशभरातील बेघर किंवा कच्च्या घरामध्ये राहणाऱ्या कुटुंबांसाठी प्रधानमंत्री आवास योजना ग्रामीण एक वरदान ठरणारी योजना आहे. या योजनेत महिलांना प्राधान्य देण्यात येते, एकूण लाभार्थ्यांपैकी 73 टक्के यामध्ये महिलाच आहेत. यामुळे महिलांच्या नावे पक्के घर उपलब्ध होण्यास मदत मिळते.
6. स्टँड-अप योजना-
ही योजना अनुसूचित जाती व अनुसूचित जमातीतील महिलांना स्वतःचा व्यवसाय सुरू करण्यासाठी प्रोत्साहन देते. या योजनेच्या माध्यमातून बँकेकडून 10 लाख ते 1 कोटी रुपयांपर्यंत कर्ज देण्यात येते. यामुळे महिलांना उद्योजक बनण्याची संधी प्राप्त होते.
नोट- महत्वपूर्ण अशी माहिती आहे, इतरांबरोबर शेअर करा व अधिक माहितीसाठी आपला व्हाट्सअॅप ग्रुप जॉईन करा.